Здароўе для ўсіх дорага
Ці менш хварэюць жыхары такіх аддаленых вёсак? Пра гэта дакладна ведае загадчыца Зеляневіцкага ФАПа Анастасія Шчарбовіч. Дзяўчына працуе тут паўгода па мэтавым накіраванні з Брэсцкага медыцынскага каледжа. За мінулы час асвоілася з абавязкамі займаемай пасады, пазнаёмілася з мясцовымі асаблівасцямі.
— У зоне маёй адказнасці 8 населеных пунктаў — Зеляневічы, Галоўчыцы, Кузявічы, Шэйпічы, Ярашэвічы, Мазалі, Зіновічы, Рачкі. У апошняй вёсцы ўвогуле толькі двое жыхароў,— расказвае Анастасія Аляксандраўна.— Але, тым не менш, любому патрэбна аднолькавая меддапамога, нягледзячы на адлегласць.
Фельчар ФАПа ажыццяўляе прыём ва ўстанове, але і нярэдка выязджае на канкрэтны адрас па выкліку. Дзякуючы поўнаму аснашчэнню, медыцынскае абслугоўванне «на месцы» або ў паходным варыянце аказваецца на аднолькавым узроўні. У выніку спецыяліст можа правесці амаль усе тэрапеўтычныя працэдуры, паставіць уколы, замерыць артэрыяльны ціск, зняць электракардыяграму. Здараецца, што і з траўмамі даводзіцца спраўляцца. Чаму нярэдка фельчара называюць універсальным медыкам. Нават і з-за таго, што ён прымае наведвальнікаў любога ўзросту — ад немаўляці да ветэранаў. Зразумела, што спецыяльная медыцынская дапамога даступна толькі ў буйных установах. Хаця і сюды рэгулярна прыязджае ўрач, каб арганізаваць зручны прыём пацыентаў. Гэта вызваляе мясцовых жыхароў ад неабходнасці далёка ехаць.
А яшчэ на базе ФАПа працуе мясцовая аптэка, дзе можна набыць найбольш запатрабаваныя лекі або заказаць нешта індывідуальнае. Што будзе прывезена ў самы кароткі тэрмін.
І калі меркаваць па загружанасці ўстановы, можна прыйсці да высновы адносна яе запатрабаванасці ў вяскоўцаў. Па словах Анастасіі Шчарбовіч, бывае, што і невялікая чарга ўтвараецца. Здараецца так не кожны дзень, тым больш што ФАП прымае ўсіх жадаючых 6 дзён на тыдзень, з 8 да 15 гадзін.
Алег Сідарэнка
Источник: budni.by
